Arzon lid o'z-o'zidan yaxshi ham, yomon ham emas. Agar u filtrdan o'tgan va sotuvga aylanayotgan bo'lsa — bu kuchli talab belgisi. Agar u filtrsiz va sotuvsiz bo'lsa — bu shunchaki arzon shovqin.
Ko'p tadbirkor reklama hisobotida faqat bitta raqamni ko'radi: lid narxi. U pasaysa — xursand. Ammo lid narxi pasayib, sotuv ham pasayib ketgan holatlarni ko'p ko'rganmiz.
Qisqacha:
- Juda arzon lid ko'pincha sifatsiz bo'ladi.
- Filtrdan keyin ham arzon lid — haqiqiy talab.
- Lid narxini emas, MQL va mijoz narxini o'lchang.
Qachon arzon lid xavfli?
Agar lid tasodifiy bosishlardan, noto'g'ri auditoriyadan yoki "sovg'a"li reklamadan kelayotgan bo'lsa, u arzon tushadi va hech narsa sotmaydi. Operator kun bo'yi "men ariza qoldirmaganman" degan javob eshitadi.
B2B'da juda past lid narxini ko'rsangiz, birinchi savol: "Bular kim?" Formada ism va telefondan boshqa hech narsa bo'lmasa, javob yo'q.
Qachon arzon lid — haqiqiy talab?
Nasiya savdo ERP'si Loome bilan teskari holat bo'ldi. Ariza qoldirish uchun odam 10 ta savolga javob berdi: biznesi, aylanmasi, hozirgi yechimi. Shunda ham ariza $0.16 dan, MQL $0.41 dan tushdi va 10+ sotuv bo'ldi.
Bu yerda arzonlik filtrdan keyin keldi. Demak, og'riq kuchli va nisha bo'sh. Batafsil: Loome keysi.
Yana bir misol — UIC IT Academy. Lid $0.14 dan tushdi. Reklamada kurs narxi yozilganda esa lid $1.79 ga oshdi. Qimmatroq, lekin narxni bilib kelgan odam sotuvga yaqinroq.
Lid sifatini qanday tekshirish kerak?
Uchta raqamga qarang:
- Lidlardan qanchasi MQL bo'ldi?
- MQL'dan qanchasi uchrashuvga keldi?
- Uchrashuvdan qanchasi sotib oldi?
Agar birinchi raqam past bo'lsa, muammo auditoriyada yoki formada. Agar uchinchisi past bo'lsa — taklifda yoki sotuv jarayonida.
Juda ko'pchilik qayerda xato qiladi?
Xato — agentlikka KPI sifatida faqat lid narxini berish. Agentlik lid narxini tushiradi: formani qisqartiradi, auditoriyani kengaytiradi. Raqam chiroyli, sotuv yo'q.
Aslida to'g'ri yo'l — KPI'ni voronkaning pastroq bosqichiga bog'lash: MQL narxi yoki uchrashuv narxi. Biz MQL bo'yicha javob beramiz, sotuv esa mijozning sotuv jamoasi bilan birga hal bo'ladi.
Xulosa
Xullas, lid narxi — termometr, tashxis emas.
- Formaga filtr qo'ying.
- Lid, MQL va sotuv narxini alohida kuzating.
- Juda arzon lidni tekshiring: kim kelyapti?
- KPI'ni MQL yoki uchrashuvga bog'lang.
Reklama hisobotlaringizni birga ko'rib chiqamiz — konsultatsiyaga yozilish.
Muallif haqida. Safarmurod Abduroziqov — AURA Digital asoschisi va rahbari. 6 yillik marketing tajribasi, 50+ IT loyiha, ~$1 mln boshqarilgan reklama budjeti. Telegram · LinkedIn
Ko'p beriladigan savollar
B2B'da normal lid narxi qancha?
Universal raqam yo'q: soha, chek va filtrga bog'liq. Muhimi lid emas, MQL va mijoz narxi. Bir nishada MQL $0.41, boshqasida $10–15 bo'lishi normal.
Arzon lid nega sotmaydi?
Ko'pincha filtrsiz forma va keng auditoriya tufayli. Bunday lidlar orasida mijoz bo'lishi mumkin bo'lganlar kam.
Reklamada narxni yozish kerakmi?
Test qiling. UIC IT Academy'da narx yozilganda lid $0.14 dan $1.79 ga oshgan, lekin bunday lid sotuvga yaqinroq bo'ladi.
Agentlikka qanday KPI berish kerak?
Faqat lid narxi emas: MQL narxi, uchrashuvlar soni yoki CAC. Shunda agentlik sifatli lid uchun ishlaydi.